Këtë të enjte, protestuesit kanë bërë thirrje për një tjetër tubim në orën 10:00 para Kuvendit. Njoftimi u bë gjatë protestës së zhvilluar mbrëmjen e djeshme para Kryeministrisë. Një prej folësve u kërkoi qytetarëve të mblidhen për të protestuar gjatë seancës parlamentare dhe për të penguar hyrjen e deputetëve në Kuvend.
"Nesër, në orën 10:00, do të ndalojmë deputetët të hyjnë në Parlamentin tonë. U bëjmë thirrje punonjësve dhe drejtuesve të Policisë së Shtetit të kenë kujdes se kë prekin me dorë. Parlamenti është i qytetarëve dhe jo i tyre", u shpreh ai.
Protesta e kaluar para Kuvendit është shoqëruar me tensione. Sheshi para parlamentit u kthye në përplasje fizike mes protestuesve dhe forcave të Shqiponjave. Këta të fundit sërish përdorën dhunë gjatë shoqërimeve. 6 nga protestuesit u ndaluan, ndërsa disa orë më pas Dritan Goxhaj dhe 5 të tjerët u liruan.
