Delegacioni i partisë italiane “Lëvizja Pesë Yje” në Parlamentin Europian ka propozuar mbajtjen e një debati që do të pasohet nga një rezolutë mbi Shqipërinë dhe për resortin që Jared Kushner synon të ndërtojë në Shqipëri. Kërkesa është bërë që çështja të futet në rendin e ditës për seancën plenare të javës së ardhshme në Strasburg.
“Është një debat jo vetëm për Shqipërinë, por mbi të gjitha për një çështje demokratike, një çështje dialogu dhe pjesëmarrjeje, e cila duhet të hapet me përfaqësuesit e shoqërisë civile", - theksoi Pasquale Tridico, kreu i delegacionit të “Lëvizjes Pesë Yje” në Parlamentin Europian.
Titulli i propozuar i debatit është "Deklaratë e Këshillit dhe Komisionit mbi situatën në Shqipëri: sigurimi i dialogut demokratik dhe pjesëmarrjes qytetare". Debati do t'i paraprijë votimit plenar mbi mocionin me të njëjtin emër, i cili përqendrohet në zgjerimin, sundimin e ligjit në Shqipëri dhe ndërtimin e resortit të Kushner.
Propozimi aktualisht po shqyrtohet nga Konferenca e Presidentëve të Parlamentit Europian nëse debati do të përfshihet apo jo në rendin e ditës përfundimtar të seancës plenare.
“Vajzat dhe djemtë në Shqipëri po protestojnë jo vetëm për një çështje mjedisore, por për shumë më tepër: sundimin e ligjit, pjesëmarrjen demokratike, të drejtat e shkelura dhe pagat e ulëta" - Tridico.
"Shpresoj," shtoi kreu i delegacionit të Lëvizjes Pesë Yje, "që nëse një ditë BE-ja e mirëpret Shqipërinë, vendi do të jetë në gjendje të flasë me zërin e shoqërisë civile, të njëjtin zë si të rinjtë që protestojnë sot për të drejta të shenjta." ©LAPSI.al
