Autoritetet ruse kanë pezulluar përkohësisht mbërritjet dhe nisjet e fluturimeve në katër aeroportet kryesore të Moskës pas një sulmi të gjerë me dronë ukrainas ndaj kryeqytetit rus.
Agjencia Federale e Transportit Ajror të Rusisë (Rosaviatsiya) njoftoi se kufizimet janë vendosur në aeroportet Vnukovo, Domodedovo, Zhukovsky dhe Sheremetyevo, me qëllim garantimin e sigurisë së fluturimeve.
Sipas kryebashkiakut të Moskës, Sergey Sobyanin, forcat ruse të mbrojtjes ajrore rrëzuan 194 dronë gjatë afrimit të tyre drejt kryeqytetit. Ai e cilësoi sulmin si një nga më të mëdhenjtë që ka përjetuar Moska që nga fillimi i luftës në Ukrainë, duke shtuar se një rafineri nafte është goditur gjatë sulmit.
Ministria ruse e Transportit bëri të ditur se kompanitë ajrore po rishikojnë oraret e fluturimeve për shkak të kufizimeve të vendosura në rajonin e Moskës, ndërsa situata në aeroporte mbetet e qetë.
Për të përballuar fluksin e pasagjerëve, autoritetet kanë angazhuar staf shtesë dhe kanë vendosur në dispozicion dyshekë, rrogozë, ujë të pijshëm si dhe dhoma falas për nënat me fëmijë.
Në një postim në Telegram, Sobyanin tha se sistemet ruse të mbrojtjes ajrore vazhdojnë të zmbrapsin atë që ai e përshkroi si një sulm ukrainas në shkallë të gjerë ndaj Moskës.
