Dy persona janë arrestuar dhe një tjetër është vënë nën masën “detyrim paraqitje” në kuadër të hetimeve për një skemë të dyshuar të përfitimit të paligjshëm të pronave në zonën e Levanit. Në pranga ranë Ervin Habilaj, 49 vjeç, i dyshuar si përfitues i pronave, dhe Ertis Shehu, 46 vjeç, ish-drejtor i ASHK Fier. Ndaj Emiljano Rukos, 40 vjeç, ish-topograf pranë Kadastrës, u caktua masa “Detyrim për t’u paraqitur në Policinë Gjyqësore”. Sipas hetimeve, Habilaj dyshohet se ka bashkëpunuar me Shehun dhe Rukon për falsifikimin e dokumenteve me qëllim përfitimin e padrejtë të pasurive të paluajtshme.
Çështja po hetohet për “Falsifikim të dokumenteve”, “Mashtrim”, “Pastrim të produkteve të veprës penale” dhe “Shpërdorim të detyrës”. Prokuroria e Fierit po verifikon edhe raste të tjera të dyshuara për falsifikim dokumentesh, fshehje të ardhurash dhe shpërdorim detyre, si dhe përfshirjen e personave të tjerë në skemë.
