Shërbimet e Komisariatit të Policisë Kufitare kanë konstatuar në Ksamil një mjet lundrues që kishte shkelur perimetrin e sigurisë, duke hyrë në zonën e përcaktuar për notim. Sipas policisë, pas konstatimit, drejtuesit të mjetit iu dha sinjali për të ndaluar me qëllim kryerjen e verifikimeve të nevojshme, por ai nuk iu bind urdhrit të efektivëve të Policisë Kufitare.
Për këtë shkelje, autoritetet kanë vendosur bllokimin e mjetit lundrues për një periudhë 60-ditore, ndërsa pronari i tij, shtetasi A.M., banues në Ksamil, është ndëshkuar me masë administrative prej 500 mijë lekësh. Nga verifikimet paraprake rezulton se biznesi në pronësi të tij disponon dhe përdor edhe 10 mjete të tjera lundruese, të cilat aktualisht po i nënshtrohen kontrolleve nga strukturat përkatëse. Burime nga Policia Kufitare bëjnë me dije se kontrollet në vijën bregdetare do të vijojnë çdo ditë gjatë sezonit turistik, me fokus respektimin e rregullave të lundrimit dhe garantimin e sigurisë së pushuesve në zonat e notimit.
