SPAK kreu këtë javë për herë të parë një arrestim pa ndihmën e policisë, duke ngritur dyshimi mbi marrëdhënien e vërtetë të besimit mes dy institucioneve.
Klodian Braho u pyet për këtë cështje në Kuvend nga deputetë të Partisë Socialiste, dhe kreu i SPAK, duke vlerësur Policinë në parim, shpjegoi se duhet pavarësi e BKH-së, pasi mes uniformave blu ka njerëz me probleme me ligjin.
Deputeti i PS, Erjo Mile: Kemi humbje besimi të SPAK dhe BKH tek Policia e Shtetit apo ka arsye të tjera?
Klodian Braho: Gjatë vitit 2025, Policia rriti referimet në SPAK. Kemi vlerësimin më të madh për shumicën e Policisë së Shtetit. Si në çdo institucion tjetër jo të gjithë janë një lloj. Ndonjëri ka ose mund të ketë probleme me ligjin. Policia e Shtetit është partneri ynë kryesor, por ne presim më shumë nga Policia dhe ka vend për më shumë.
Veprimet e kryera nga BKH për arrestime, janë të lejuara nga ligji. Pengesat në disa raste mund të vijnë sepse mungon infrastruktura operacionale dhe teknike nga ana jonë. SPAK duhet të ketë pavarësi operacionale, nuk mund të varet nga institucione të tjera.
Ne nuk e zëvendësojmë dot Policinë e Shtetit, por duhet të jemi të pavarur të bëjmë të gjithë ciklin e veprimeve të nevojshme procedurale.
