Një operacion i koduar policor ka çuar në goditjen e një baze të kultivimit dhe përpunimit të kanabisit në zonën e Divjakës. Si rezultat i kontrolleve intensive nga toka dhe ajri, policia ka zbuluar një plantacion prej 1426 bimësh narkotike të kultivuara në një tokë shtetërore, pranë rezervuarit të Divjakës.
Sipas policisë, pjesa më e madhe e bimëve të gjetura janë asgjësuar në vend me anë të djegies, ndërsa një pjesë është sekuestruar në cilësinë e provës materiale.
Përveç plantacionit, forcat e rendit kanë zbuluar dhe sekuestruar edhe 44 kilogramë kanabis, e cila ishte duke u përpunuar dhe tharë në një ambient të përshtatur posaçërisht për këtë qëllim.
