Tensionet në Lindjen e Mesme janë rritur ndjeshëm pas një serie sulmesh të reja ushtarake të kryera nga Shtetet e Bashkuara kundër objektivave iraniane për të dytën natë radhazi. Operacionet, të urdhëruara nga presidenti amerikan Donald Trump, vijnë mes përshkallëzimit të konfliktit dhe dështimit të përpjekjeve diplomatike mes dy vendeve.
Komanda Qendrore Amerikane (CENTCOM) njoftoi se sulmet kishin në shënjestër sisteme të mbikëqyrjes ushtarake, rrjete komunikimi dhe objekte të mbrojtjes ajrore iraniane. Sipas ushtrisë amerikane, operacioni u krye si përgjigje ndaj asaj që Uashingtoni e cilëson “agresion të vazhdueshëm iranian”.
Në reagim, Irani paralajmëroi masa hakmarrëse dhe shpalli mbylljen e plotë të Ngushticës së Hormuzit, një prej korridoreve më të rëndësishme detare për tregtinë globale të naftës. Autoritetet iraniane deklaruan se çdo mjet që tenton të kalojë në zonë mund të konsiderohet objektiv ushtarak.
Ndërkohë, raportime kontradiktore kanë dalë lidhur me zhvillimet në ngushticë. Mediat shtetërore iraniane pretenduan se janë goditur dy anije që po lëviznin në zonë, ndërsa CENTCOM mohoi kategorikisht çdo sulm ndaj anijeve amerikane, duke i cilësuar pretendimet si të pavërteta.
Alarmi është përhapur edhe në vendet e Gjirit Persik. Sirenat e emergjencës u aktivizuan në Bahrein, ku ndodhet Flota e Pestë e Marinës Amerikane, ndërsa Kuvajti raportoi se sistemet e tij të mbrojtjes ajrore janë vendosur në gatishmëri dhe kanë kryer veprime parandaluese.
Mediat iraniane raportojnë gjithashtu për përplasje të mundshme mes njësive të Gardës Revolucionare dhe forcave detare amerikane në zonën e Detit të Omanit. Sipas këtyre raportimeve, shpërthime janë dëgjuar në Bandar Abbas, në ishullin Qeshm dhe në disa qytete të tjera jugore të Iranit.
