Teksa kryeministri Edi Rama ndodhet në Vlorë, ku po bisedon me banorët e zonës lidhur me projektin që është planifikuar të ndërtohet aty, në Tiranë ka nisur protesta e gjashtë kundër këtij investimi.
Mijëra qytetarë janë mblidhur në sheshin “Skënderbej”, e më pas po vijojnë marshimin drejt Kryeministrisë, aty ku dhe pozicionohen çdo ditë për disa orë.
As këtë herë nuk kanë munguar pankartat dhe thirrjet për kundërshtimin e projektit të Zvërnecit, dorëheqjen e qeverisë dhe Ramës.
“Edi Rama dorëhiqu”, brohorasin ata njëzëri, ndërsa nuk kanë munguar edhe pankartat pikante si: “Rama n’burg, Berisha n’burg”, “Atdheu nuk është në shitje”, “Toka është e maskarenjve por Atdheu i shqiptarëve”, “2000 euro metri katror, 600 euro qeraja, 700 euro paga”, “Ju jeni hajdutë”, “Di gjë ka ilaç kundër helmit të gjakpirësve”, “Shoqëria është e jona”.
Qytetarët mbajnë në duar flamuj kuq e zi, flamuj me mbishkrimin autoktonë, si edhe kanë ndezur flakadanë.
