Zjarri aktiv prej ditësh në Priskë të Madhe ka marrë përmasa të mëdha duke u përhapur me shpejtësi drejt Lundrës, Farkës së Madhe dhe Gurrës, ku përveç sipërfaqeve të shumta me bimësi e ullishte, ka djegur një shtëpi të pabanuar dhe ka detyruar evakuimin e tre familjeve.
Situata mbetet e rënduar edhe për blegtorët e zonës, pasi dhjetëra bagëti kanë mbetur të bllokuara në zonat pyjore të përfshira nga flakët me dyshimin se një pjesë e tyre mund të kenë ngordhur.
Përballë këtij rreziku serioz për banorët dhe pronat e tyre, operacioni i shuarjes po vijon me ndërhyrje masive nga toka dhe ajri, ku dy helikopterë po furnizohen me ujë në Liqeni e Farkës për të goditur vatrat kryesore.
