Ukraina sulmoi sot një depo që i përkiste gjigantit rus të elektronikës “Ozon” për të dytën ditë radhazi. Sulmi erdhi pas njoftimit të nisjes së një fushatë të zgjeruar kundër infrastrukturës logjistike ruse.
Një zjarr shpërtheu dhe më shumë se 300 punonjës u evakuuan nga qendra logjistike e Ozon, kompanisë së dytë më të madhe të tregtisë elektronike në Rusi. Sulmi ndodhi në rajonin e Orenburgut, në pjesën qendrore të vendit. Sulmi me dron ukrainas u konfirmua edhe nga vetë kompania në një njoftim për mediat.
Një ditë më parë forcat ukrainase goditën një depo të kompanisë në provincën fqinje Samaran, duke plagosur disa persona, sipas Ozon. Kievi ka shënjestruar prej muajsh depot e Wildberries, kompanisë më të madhe të elektronikës në vend, duke pretenduar se ajo furnizon me komponentë ushtrinë ruse.
"Pasi njësitë ukrainase goditën 15 qendrat më të mëdha logjistike të Wildberries, tani është radha e Ozonit", - njoftoi dje Ministria e Mbrojtjes e Ukrainës në një postim në Telegram. Wildberries dhe Ozon shpesh krahasohen me Amazon për dominimin e tyre në këtë sektor në Rusi.
Presidenti rus Vladimir Putin shprehu të mërkurën mbështetjen e tij për Wildberries dhe njoftoi se qeveria do të ndërmarrë hapa për të rindërtuar depot e shkatërruara nga sulmet me dronë ukrainasë.
Moska ka dënuar sulmet ndaj “infrastrukturës së saj”. Ato vijnë më shumë se 4 vjet pas fillimit të ofensivës së saj në shkallë të gjerë në Ukrainë, e cila ka vrarë dhjetëra mijëra njerëz dhe ka shkatërruar qytete të tëra. ©LAPSI.al
