Mediat greke kanë publikuar pamjet e momentit të rrëzimit të një helikopteri “Bell 206” pranë heliportit të Sifnos, duke shkaktuar vdekjen e menjëhershme të 3 personave në bord.
Viktimat janë piloti grek dhe një çift britanik i sapomartuar që po udhëtonin për në ishull.
Dëshmitarët okularë raportuan një zhurmë dhe tym të çuditshëm nga helikopteri pak para rrëzimit të tij. Autoritetet po verifikojnë shkaqet e tragjedisë. Dyshohet se shkak është bërë një defekt në helikën e bishtit e helikopterit.
Çifti kishte zgjedhur të udhëtonte për në Sifnos për muajin e mjaltit, kishte rezervuar një dhomë për qëndrimin e tyre në ishull dhe kishte zgjedhur të udhëtonte me helikopter për ta bërë këtë udhëtim të parë si çift i martuar edhe më të veçantë.
Piloti ishte i martuar dhe baba i tre fëmijëve të rritur. Ai kishte përvojë të gjatë fluturimi me helikopterë ushtarakë Chinook. /LAPSI.al
