Komisioni i Disiplinës dhe Etikës së FSHF-së ka publikuar vendimet, me një sërë masash të forta ndaj klubeve, lojtarëve dhe zyrtarëve. Në qendër të vendimeve janë Tirana, Vllaznia, Besa dhe Lushnja, të cilat përballen me ndalimin e regjistrimit të lojtarëve të rinj për tre periudha regjistrimi, për shkak të detyrimeve të pashlyera të përcaktuara nga Dhoma Kombëtare e Zgjidhjes së Mosmarrëveshjeve.
Tirana është një nga klubet më të prekura nga vendimi. Për shkak të mospërmbushjes së dy vendimeve të Dhomës Kombëtare të Zgjidhjes së Mosmarrëveshjeve, në çështjet Romeo Harizaj–KF Tirana dhe Gledi Mici–KF Tirana, klubit i ndalohet regjistrimi i lojtarëve të rinj për 3 periudha regjistrimi, deri në shlyerjen e plotë të detyrimeve.
Edhe Vllaznia është dënuar me të njëjtën masë, pas mospërmbushjes së vendimit në çështjen Liridon Latifi–KF Vllaznia. Po ashtu, FC Besa përballet me bllokim të regjistrimit të lojtarëve të rinj për 3 periudha në dy çështje, atë me Emiljano Çelën dhe atë me Bekim Kulin.
Në të njëjtën situatë ndodhet edhe KF Lushnja, e cila është dënuar me ndalimin e regjistrimit të lojtarëve të rinj për tre periudha, për shkak të moszbatimit të vendimit në çështjen Ardit Hoxhaj–KF Lushnja.
Tre afate 30-ditore për Tiranën
Problemet e Tiranës me vendimet e Dhomës së Zgjidhjes së Mosmarrëveshjeve nuk përfundojnë këtu. Komisioni ka pranuar edhe kërkesat e Kleandro Lleshit, Fatmir Prengajt dhe Erisildo Smaçit, duke i dhënë klubit një afat paralajmërues prej 30 ditësh për ekzekutimin e vendimeve përkatëse.
Edhe Vllaznia është përballur me një masë të ngjashme, me një afat 30-ditor për ekzekutimin e vendimit në çështjen Ildi Gruda–KF Vllaznia.
8 ndeshje pezullim për zyrtarin e Vorës
Një nga pezullimet më të rënda të këtij vendimi i është dhënë zyrtarit të KF Vorës, Bazion Tragaj. Për sjellje josportive të përsëritur ndaj zyrtarëve të ndeshjes, Tragaj është dënuar me 8 ndeshje pezullim nga veprimtaritë. Përgjatë kësaj periudhe, atij i ndalohet gjithashtu hyrja në dhomat e zhveshjes dhe ambientet e brendshme të stadiumit.
Me nga 2 ndeshje pezullim janë dënuar edhe lojtari i Vllaznisë Adnard Mehmeti, për provokim të spektatorëve, dhe zyrtari i Tiranës Omer Bunjaku, për protestë ndaj vendimeve të zyrtarëve të ndeshjes.
Gjobat për klubet
Komisioni ka marrë masa edhe për sjelljen e tifozëve gjatë ndeshjeve. KF Laçi është gjobitur me 100 mijë lekë për mosmarrjen e masave të nevojshme për garantimin e rendit dhe sigurisë, si dhe për hedhjen e sendeve në fushën e lojës.
Skënderbeu është dënuar gjithashtu me 100 mijë lekë, pas ndezjes së flakadanëve dhe hedhjes së sendeve në fushë.
Ndërkohë, Vllaznia është gjobitur me 50 mijë lekë për hedhjen e sendeve në fushën e lojës, ndërsa Tirana me 50 mijë lekë për ndezjen e flakadanëve dhe mjeteve të tjera piroteknike.
Për Teutën, Komisioni ka dhënë një paralajmërim për problematika teknike apo organizative që mund të shkaktojnë ndërprerjen e zhvillimit normal të ndeshjeve. Në rast përsëritjeje, klubi do të jetë subjekt i masave disiplinore të parashikuara në rregullore.
