“Jam më mirënjohës ndaj saj sesa do të mund ta shpreh ndonjëherë me fjalë”. Mesazhi i Ronald Koeman shpreh një dhimbje të jashtëzakonshme për vdekjen e bashkëshortes së tij, Bartina. Ajo ishte 65 vjeç dhe vuante prej disa vitesh nga tumori. Ish-trajneri i kombëtares së Holandës ishte vetë ai që njoftoi vdekjen e gruas me të cilën kishte ndarë një pjesë të jetës. “Me trishtim të pafund, por edhe me krenari dhe dashuri të madhe, i themi lamtumirë bashkëshortes sime të mrekullueshme, nënës dhe gjyshes sonë të dashur”.
Diagnoza në vitin 2010, më pas tumori u rikthye në 2018
Në vitin 2010 erdhi rezultati i parë i analizave: Bartinës iu diagnostikua kanceri i gjirit. Ajo nisi një cikël të gjatë trajtimesh dhe ndoqi rrugëtimin terapeutik të përshkruar për të. U nënshtrua ndaj gjithçkaje që ishte e nevojshme dhe e mundur për të kapërcyer atë sëmundje të rëndë, por në vitin 2018, kur kanceri dukej se tashmë mund të ishte vetëm një kujtim i keq, ajo u përball sërish me rezultatet e kontrolleve. Sëmundja ishte rikthyer dhe në vitet pasuese gjendja e saj shëndetësore pati ulje-ngritje dhe kërkoi trajtime të vazhdueshme mjekësore.
Në vitin 2025, Bartina kishte folur publikisht për situatën e saj, për periudhat e vështira që kishte kaluar dhe përballuar falë mbështetjes së familjes. “Kam fëmijë të mrekullueshëm, nipër e mbesa të mrekullueshëm dhe një bashkëshort fantastik”.
Koeman kishte treguar se sa shumë ndikonte sëmundja në jetën e tyre
Gjatë periudhës kur ishte trajner i kombëtares holandeze, Koeman i ishte referuar shpesh gjendjes shëndetësore të bashkëshortes, e cila nuk mund ta shoqëronte gjatë angazhimeve të tij me Holandën. “Është e vështirë që të vijë, sepse çdo të mërkurë merr trajtimin. Dhe më pas ka efekte anësore për një ose dy ditë”. Në tetor 2025, madje, ai u detyrua të largohej nga grumbullimi i skuadrës me rastin e ndeshjeve kualifikuese të Botërorit 2026 kundër Maltës dhe Finlandës: u nis me vrap drejt bashkëshortes, e rraskapitur nga rikthimi i sëmundjes dhe vështirësia e terapive.
“Ka të bëjë me bashkëshorten time”, tha ai pa shtuar detaje të tjera në shpjegimin e tij, për të ruajtur privatësinë mbi një histori kaq të dhimbshme personale. Por ata që e kishin pranë, ata që e dinin gjendjen e tij emocionale, e dinin mirë se ajo largim i papritur ishte shenjë e diçkaje tjetër. “Bashkëshortja ime Bartina, pavarësisht rrugëtimit të saj me sëmundjen, më ka mbështetur dhe inkurajuar çdo ditë për ta përfunduar punën time si trajner i kombëtares”.
Një jetë së bashku larg vëmendjes së publikut
Nuk ka pasur asnjëherë rrjet social apo thashethem mediatik që ta ketë prekur çiftin, i cili gjithmonë e ka jetuar marrëdhënien e tij në mënyrë shumë “normale” dhe larg vëmendjes së publikut, pavarësisht karrierës që e ka vendosur Koemanin shpesh në qendër të vëmendjes, si futbollist ashtu edhe trajner. Dhe fjalia “jam më mirënjohës ndaj saj sesa do të mund ta shpreh ndonjëherë me fjalë” është përmbledhja e duhur e një jete të kaluar së bashku. Bartina dhe Ronald Koeman ishin të martuar prej vitesh dhe nga martesa e tyre lindën tre fëmijë: Tim, Ronald Jr. dhe Debbie. Vitet e fundit kishin përjetuar edhe gëzimin e zgjerimit të familjes me ardhjen e nipërve e mbesave.
