Qytetarë dhe aktivistë janë mbledhur këtë mbrëmje në bulevardin “Dëshmorët e Kombit”, përpara godinës së Kryeministrisë, në vijim të protestës që po zhvillohet prej disa ditësh radhazi në kryeqytet. Protestuesit kanë nisur grumbullimin në orët e mbrëmjes, duke mbajtur pankarta dhe duke artikuluar kërkesat e tyre përmes thirrjeve dhe fjalimeve publike.
Ashtu si edhe në ditët e mëparshme, pjesëmarrësit kërkojnë dorëheqjen e kryeministrit Edi Rama, transparencë mbi çështje të ndryshme me interes publik, si dhe hetimin e pasurive të politikanëve. Në fokus të protestave kanë qenë edhe kundërshtimet ndaj projektit të investimit në Zvërnec, të cilin protestuesit e konsiderojnë të dëmshëm për interesin publik dhe mjedisin.
Atmosfera në bulevard paraqitet e qetë, ndërsa forca të Policisë së Shtetit janë të pranishme për të garantuar mbarëvajtjen e tubimit. Organizatorët kanë bërë thirrje për pjesëmarrje qytetare dhe zhvillim paqësor të protestës.
