Një buall albino i rrallë dhe i bërë viral në Bangladesh për shkak të nofkës "Donald Trump" i shpëtoi sakrificës gjatë Kurban Bajramit të këtij viti. Shkak u bë ndërhyrja e autoriteteve qeveritare, tha për Reuters një zyrtar i ministrisë së brendshme.
Kafsha, me peshë gati 700 kilogramë, ishte shitur dhe po përgatitej për therjen rituale kur ndërhynë autoritetet. Ministri i brendshëm i Bangladeshit, Salahuddin Ahmed urdhëroi që bualli të shpëtohej, paratë t'i ktheheshin blerësit dhe kafsha të transferohej në kopshtin zoologjik kombëtar në Daka.
Ajo që filloi si një rutinë blerjesh për Bajramin, shpejt u shndërrua në një kuriozitet kombëtar pasi videot u bënë virale. Turma njerëzish nisën të mblidheshin në fermë, me vizitorë që udhëtonin nga larg për të parë balluken bjonde që i ngjante presidentit amerikan.
Sipas pronarit 38-vjeçar të fermës, Ziauddin Mridha, emri ishte ideja e vëllait të tij më të vogël, i cili vuri re ngjashmërinë. Ai shtoi se kafsha është jashtëzakonisht e qetë dhe kërkon kujdes duke përfshirë ushqyerjen e shpeshtë dhe larjen e rregullt.
Gjatë gjithë majit, vizitorë kuriozë, fëmijë dhe përdorues të mediave sociale kanë vërshuar në fermë për të parë nga afër kafshën e famshme. Në videot dhe fotot që qarkullojnë në internet, punëtorët e lajnë buallin me ujë dhe ia krehin me kujdes balluket midis brirëve të mëdhenj e të lakuar.
"Luksi i vetëm që gëzon është se lahet 4 herë në ditë", - komentoi pronari i tij, duke sqaruar se ngjashmëria me Trumpin kufizohet vetëm te qimet e tij.
Sipas ekspertëve të shërbimit veterinar të cituar nga Agjencia Franceze, buallicat me albinizëm janë jashtëzakonisht të rralla dhe zakonisht kanë një ngjyrë të bardhë ose rozë për shkak të mungesës së melaninës. ©Reuters, LAPSI.al
A rare albino buffalo in Bangladesh — nicknamed 'Donald Trump' for its distinctive blond tuft — has been spared from Eid al-Adha sacrifice after a last-minute government intervention, a Home Ministry official said https://t.co/Wqubh7LTM6
— Reuters (@Reuters) May 27, 2026
