Një moment disi i sikletshëm ka shoqëruar takimin mes kryeministrit Edi Rama dhe homologes japoneze Sanae Takaichi gjatë vizitës zyrtare në Tokio. Teksa dy liderët po përshëndeteshin para kamerave, Rama tentoi t’i puthte dorën kryeministres japoneze, por ajo e shmangu me mirësjellje gjestin, duke ruajtur protokollin e ftohtë karakteristik japonez.
Kjo nuk është hera e parë që kryeministri Edi Rama përpiqet të sillet spontan në takimet ndërkombëtare, duke zgjedhur teatralitetin personal mbi formalitetin diplomatik. Shfaqja me atlete të bardha në samite ndërkombëtare, veprimet e pakontrolluara përpara fotove familjare të liderëve të shteteve europiane, puthjet apo gjunjëzimet para kryeministres së Xhorxhia Melonit janë vetëm disa nga gjestet me të cilat Rama tenton të bjerë në sy. Vetëm se skena të tilla nuk janë të këshilluara në Japoni, një kulturë ku kontakti fizik në protokollin zyrtar është minimal dhe ku gjeste të tilla konsiderohen të tepërta, sidomos në raport me një grua në poste të larta shtetërore.
Pavarësisht episodit të sikletshëm, dy liderët zhvilluan një takim zyrtar të fokusuar në forcimin e marrëdhënieve mes Shqipërisë dhe Japonisë. Takaichi deklaroi se Shqipëria është një partner i rëndësishëm për Japoninë dhe vlerësoi progresin e vendit në negociatat për anëtarësim në Bashkimin Europian.
