Michael Douglas duket se po i kushton gjithnjë e më shumë rëndësi jetës larg shesheve të xhirimit.
Aktori fitues i dy çmimeve Oscar, i cili gjatë dekadave të karrierës ka interpretuar në dhjetëra filma, rrëfen për PEOPLE se nuk është më shumë aktiv në botën e kinemasë. Megjithatë, ai nuk e përjashton rikthimin në ekran nëse do t’i vinte përpara një projekt vërtet i veçantë.
“Iu thashë agjentëve të mi se, nëse kanë një regjisor të mirë dhe një skenar të mirë, sigurisht. Por nuk jam më shumë i përfshirë në karrierë”, tha Douglas, i njohur për role ikonike në “Wall Street” dhe “Fatal Attraction”.
Roli i tij i fundit madhor ishte në miniserialin e Apple TV+ “Franklin”, ku interpretoi Benjamin Franklin. Ndërkohë, së fundmi ai ka xhiruar edhe një rol të vogël në filmin e ardhshëm të regjisorit Oliver Stone, me të cilin kishte punuar në “Wall Street”.
Megjithatë, sot vëmendjen kryesore Douglas e ka te familja.
“Po përpiqem të gjej vende të bukura për t’i shijuar”, tha aktori, duke treguar se tashmë preferon të organizojë udhëtime për bashkëshorten Catherine Zeta-Jones, fëmijët e tyre Dylan dhe Carys, si edhe djalin e tij Cameron, nga martesa e mëparshme.
Në librin e tij të ri me kujtime, “One Helluva Ride”, Douglas shkruan se ritmi i jetës së tij nuk është ngadalësuar, por ka ndryshuar mënyrën se si e shpenzon kohën.
“Kam shkëmbyer aventurat e xhirimeve me aventura me familjen time”, shkruan ai, duke treguar se prej disa vitesh sigurohet të organizojë të paktën një udhëtim të madh familjar çdo vit.
Aktori pranon se, edhe nëse nuk do të shfaqej më kurrë në një film, ai e konsideron karrierën e tij të jashtëzakonshme dhe të plotë.
“Pavarësisht se çfarë ndodh, edhe nëse nuk shfaqem më kurrë në një film, ka qenë një karrierë magjike dhe e mrekullueshme”, shprehet Douglas.
Libri “One Helluva Ride” përqendrohet kryesisht te karriera e tij e gjatë. Douglas ka zgjedhur 13 nga projektet më të rëndësishme të jetës së tij profesionale dhe u ka kushtuar nga një kapitull filmave si “Fatal Attraction”, “Wall Street”, “The War of the Roses”, “Basic Instinct” dhe “The American President”.
Në libër, aktori rrëfen edhe histori nga prapaskenat e filmave dhe jetës së tij personale në periudhat kur ato janë realizuar, përfshirë marrëdhëniet me aktoren Kathleen Turner gjatë xhirimeve të “Romancing the Stone” dhe lidhjen jashtëmartesore me aktoren Jeanne Tripplehorn gjatë realizimit të “Basic Instinct”.
