Në një intervistë të re për Vogue Italia, Madonna ka rrëfyer për herë të parë me detaje për betejën e saj me jetën në vitin 2023, kur një infeksion bakterial i rëndë dhe sepsa e çuan në gjendje kritike.
Ikona e muzikës, 67 vjeçe, zbuloi se qëndroi për dy ditë në koma të induktuar nga mjekët, pasi u shtrua në repartin e kujdesit intensiv. Në atë periudhë, ajo vuante edhe nga dështimi i mushkërive dhe veshkave, ndërsa turneu i saj u pezullua përkohësisht.
Gjatë intervistës, Madonna prezantoi edhe lodrën e saj të preferuar, një oktapod vjollcë prej pelushi me emrin Octavia, të cilin e mban pranë çdo natë. Ajo tregoi se emri i lodrës është frymëzuar nga infermierja Olivia, e cila u kujdes për të gjatë ditëve më të vështira në spital.
“Kur isha në koma, infermierja Olivia më nxiste çdo ditë të luftoja dhe të dilja nga kujdesi intensiv. Më dha shumë guxim dhe shpresë. Kur dola nga spitali, motra ime më dhuroi këtë oktapod dhe menjëherë më kujtoi atë,” tha këngëtarja.
Madonna kujtoi gjithashtu rikthimin e saj në skenë gjatë turneut Celebration Tour, ku foli për përvojën pranë vdekjes.
“Jam pothuajse e sigurt se fjala e parë që thashë kur u zgjova ishte ‘Jo!’. Mendoj se Zoti po më pyeste nëse doja të shkoja me të, por unë iu përgjigja: ‘Jo!’,” rrëfeu ajo.
Artistja tregoi se rikuperimi ishte shumë i vështirë dhe se edhe ecja deri në oborrin e shtëpisë për të marrë pak diell ishte një sfidë.
Sipas saj, fëmijët ishin forca më e madhe që e ndihmoi të mos dorëzohej dhe ta rikthente në skenë.
“Fëmijët e mi më dhanë motivimin për të vazhduar. Nuk doja t’i zhgënjeja, ndaj vendosa një datë për rikthimin tim dhe e bëra realitet,” u shpreh Madonna.
