Chris Brown është urdhëruar të paguajë 13 milionë dollarë dëmshpërblim ndaj ish-punonjëses së tij të shtëpisë, Maria Avila, pasi ajo u sulmua rëndë nga qeni i këngëtarit në vitin 2020.
Sipas dokumenteve gjyqësore, Avila paditi Brown për neglizhencë, duke pretenduar se qeni i racës Caucasian Shepherd, e sulmoi ndërsa ajo po nxirrte mbeturinat në shtëpinë e tij në Tarzana, Kaliforni. Sulmi i shkaktoi plagë të rënda në fytyrë si edhe dëmtime në krah që i kanë lënë probleme të përhershme me lëvizjen.
Përveç Avilës, gjykata vendosi që bashkëshorti i saj, Oscar Olivo, të përfitojë 50 mijë dollarë, ndërsa motra e saj, Patricia, 885 mijë dollarë, pasi edhe ata ndodheshin në vendngjarje në momentin e sulmit.
Gjatë procesit gjyqësor, Brown dëshmoi se e gjeti Avilën të shtrirë në tokë, të mbuluar me gjak. Ai pranoi se u largua nga vendi i ngjarjes përpara mbërritjes së ambulancës, duke thënë se e bëri këtë me këshillën e menaxherit të tij për të shmangur vëmendjen mediatike.
Këngëtari argumentoi gjithashtu se punonjësja ishte paralajmëruar më parë për qentë dhe se nuk duhej të dilte jashtë pa shoqërimin e sigurimit, pretendim që Avila e mohoi.
Vendimi vjen në një periudhë kur Chris Brown vazhdon të përballet edhe me çështje të tjera ligjore. Në vitin 2025 ai u arrestua në lidhje me një incident të ndodhur në vitin 2023, ku akuzohet se goditi me një shishe tekile producentin muzikor Abe Diaw, i cili më pas ngriti padi duke pretenduar se kishte pësuar dëmtime serioze.
