Edhe pse tregu i punës në Shqipëri u përmirësua gjatë vitit 2025, mijëra persona me arsim të lartë vazhdojnë të mos gjejnë punë. Sipas raportit "Tregu i Punës 2025" të INSTAT, 17,800 persona me diplomë universitare rezultojnë të papunë. Më shumë se gjysma e tyre janë të rinj nën moshën 30 vjeç.
Të dhënat tregojnë se 5,370 të papunë janë të grupmoshës 15-24 vjeç, ndërsa 4,323 janë 25-29 vjeç. Në total, 9,693 persona, ose rreth 55% e të papunëve me arsim të lartë, janë nën 30 vjeç, duke treguar vështirësitë që hasin të diplomuarit për të hyrë në tregun e punës.
Gjatë vitit 2025, në Shqipëri u regjistruan gjithsej 107,548 të papunë. Prej tyre, 45,764 kishin arsim të mesëm, 43,984 arsim 8/9-vjeçar dhe 17,800 arsim të lartë. Kjo do të thotë se të diplomuarit përbëjnë rreth 16.5% të të gjithë të papunëve në vend.
Sipas raportit, një nga arsyet kryesore mbetet mospërputhja mes diplomave dhe kërkesave të tregut të punës. Ekonomia shqiptare krijon më shumë vende pune në sektorë si shërbimet, turizmi, ndërtimi dhe tregtia, ndërsa shumë të diplomuar kanë profile që nuk përputhen me nevojat e bizneseve. Në vështirësitë për punësim ndikojnë edhe mungesa e përvojës profesionale, aftësive praktike dhe lidhja ende e dobët mes universiteteve dhe tregut të punës, duke e bërë më të vështirë kalimin nga studimet në punësim.
