Analisti Fatos Lubonja, në një intervistë për emisionin “Prime News24”, komentoi zhvillimet politike në vend dhe qëndrimin e forcave politike pas protestës së fundit, duke theksuar se nevoja për reflektim nuk prek vetëm qeverinë, por edhe opozitën.
Sipas Lubonjës, kryeministri Edi Rama dhe Partia Socialiste duhet të reflektojnë përballë pakënaqësisë së qytetarëve, por edhe Partia Demokratike duhet të analizojë rolin dhe përgjegjësitë e saj në situatën aktuale politike.
Analisti u ndal veçanërisht te Ervin Salianji, i cili ka shprehur në vazhdimësi nevojën për rinovimin e Partisë Demokratike. Sipas Lubonjës, Salianji mund të kishte ndërmarrë hapa konkretë për ndryshimin e partisë, duke pasur parasysh edhe kritikat e tij të mëparshme ndaj Sali Berishës.
Lubonja vuri në dukje se, sipas tij, një reflektim i tillë nuk ka ndodhur dhe kritikoi qëndrimin e Partisë Demokratike ndaj protestës.
“Të gjitha forcat politike duke nisur nga kryeministri i pari pastaj edhe nga opozita apo partitë e tjera duhet të kishin një reflektim. Nëse Edi Rama duhet të jepte dorëheqjen dhe PS duhet të gjente rrugë të ndryshme për të reaguar ndaj kësaj proteste edhe PD duhet të bënte reflektim e vet, sepse duhet të mendonte “jemi edhe ne të akuzuar”.
Kush më mirë se Salianji që pretendon se do të rinovojë PD që e ka thënë herë pas herë që edhe Berisha është si Rama, do të duhet të ndërmerrte veprime të caktuara për ta ndryshuar PD-në. Kjo gjë nuk ka ndodhur dhe partia demokratike e pranoi protestën dhe Salianji ishte absent”, tha ai. /BW
