Gjykata ka caktuar masën e sigurisë “detyrim paraqitjeje” për Luan Muçën, pronarin e “Delta Group”, pas konfliktit të armatosur me biznesmenin Vasil Bedinaj në ambientet e hotel “Regina Palm” në Vlorë.
Masë më e rëndë është vendosur për Mandrit Lleshajn, pronarin e kompanisë “SWAT Security”, rojet e së cilës shoqëronin Muçën në momentin e konfliktit. Për të, si edhe për Blerim Hetën, shtetas nga Kosova, dhe Klaudio Lleshajn, gjykata ka caktuar masën “arrest me burg”.
Ndërsa për Angjelo Breshanin, person i lidhur me Bedinajn, i cili dyshohet se qëlloi në drejtim të automjetit “Range Rover”, është vendosur masa “arrest në shtëpi”.
Gjashtë persona të tjerë janë shpallur në kërkim, ndërsa hetimet për zbardhjen e plotë të ngjarjes vijojnë. Çështja i ka kaluar strukturës së Krimeve të Rënda në Policinë e Vlorës.
Në qendër të hetimeve mbetet edhe motivi i konfliktit, për të cilin dy biznesmenët kanë dhënë versione të ndryshme.
Vasil Bedinaj ka pretenduar se përplasja lidhet me një gjobë prej 5 milionë eurosh, për të cilën ka akuzuar Luan Muçën. Ky i fundit e ka mohuar këtë version, duke deklaruar se konflikti lidhet me një pronë në bregdetin e jugut dhe me pretendimet e palëve mbi ligjshmërinë e dokumentacionit të saj.
Pas përplasjes në ambientet e hotelit, dy nga personat e përfshirë u aksidentuan në urën e Peshkëpisë, në hyrje të Vlorës. Nga hetimet rezultoi gjithashtu se dy persona të përfshirë në konflikt ishin punonjës të Policisë Ushtarake. Ndaj tyre është marrë masa e pezullimit nga detyra.
Për konfliktin mes dy biznesmenëve reagoi edhe kryeministri Edi Rama sipas të cilit në themel të konfliktit qëndron një sipërfaqe toke shtetërore, e cila, sipas tij, do të merret përsëri nga shteti dhe do të kthehet në ullishte.
