I kuq si një spec, Declan Rice digjet nga dielli në Botëror: “Mami më qortoi”

Declan Rice e ka hundën të kuqe si spec, ballin dhe faqet e djegura nga dielli. Dhe kur ngre mëngët e uniformës, mund të shihen edhe krahët e skuqur. Jo, nuk bëhet fjalë për një përpjekje të dështuar për t’u nxirë. Ai ngjyrim është pasojë e ekspozimit gjatë punës…

Ai kaloi shumë kohë para objektivit të fotografëve duke realizuar fotot promovuese në prag të Botërorit 2026 pa përdorur asnjë produkt mbrojtës kundër rrezeve ultravjollcë. Ai buzëqesh dhe bën shaka me situatën, por bëhet serioz kur tregon se e ëma e “qortoi” për pakujdesinë.

Ironia e futbollistit: “I kuq si një spec”

Mesfushori i Arsenalit dhe Anglisë tregoi se çfarë i ndodhi pas miqësores së luajtur kundër Kosta Rikës në Florida, ndeshje e ndikuar edhe nga kushtet e këqija atmosferike. Por nëse dje shiu ishte protagonist duke vonuar testin, disa ditë më parë ishte dielli përvëlues që e zuri në befasi Rice në qendrën stërvitore të kombëtares.

“Mendoj se të gjithë i kanë parë ato foto – deklaroi futbollisti për BBC. – Isha i kuq si një spec gjatë atij seti fotografik. Mami po më vriste!”. Toni ironik hapi rrugën për një tjetër temë delikate: temperaturat përvëluese që po vënë në provë rezistencën e lojtarëve. Rice nuk bën xhiro fjalësh dhe shpjegon se cila ka qenë vështirësia më e madhe për t’u përshtatur me realitetin e ri për shkak të ndryshimit të madh klimatik nga një vend në tjetrin.

“Sinqerisht, ditën e parë që mbërritëm, vështirësia kryesore ishte të mësoheshim me vapën. Të vish nga Anglia, ku moti është gjithmonë i ndryshueshëm dhe mund të jetë ngrohtë ose freskët, dhe të gjendesh këtu ku janë vazhdimisht 30 gradë, është vërtet një goditje e fortë”.

Vapë dhe stuhi të papritura: “Çfarë po ndodh këtu?”

Paqëndrueshmëria e motit, që mund të alternojë periudha me diell dhe temperatura të larta me momente kur shirat e rrëmbyeshëm e bëjnë të pamundur lojën, ishte një tjetër temë që Rice preku. “Jemi të përgatitur edhe për këtë – shtoi ai. – Mbërritëm në dhomat e hotelit para ndeshjes dhe kishte një diell të shkëlqyer. Fjetëm pak dhe kur u zgjuam pyetëm veten: Çfarë po ndodh këtu?”.

Gjithçka ashtu siç e kishte “parashikuar” Tuchel, i cili u ka shpjeguar futbollistëve të tij se aftësia për t’u përshtatur është thelbësore në ndeshje ku “mund të luash për 60-65 minuta dhe papritur bubullimat dhe vetëtimat të detyrojnë të largohesh nga fusha. Për këtë trajneri ynë ka qenë shumë i qartë”. Dhe nëse ka diell, më mirë të dëgjosh këshillat e mamit.

Grupi i Anglisë në Botëror

Në Botëror, Anglia bën pjesë në Grupin L së bashku me Kroacinë, Ganën dhe Panamanë. Pikërisht ndaj kroatëve ajo do të debutojë në Kupën e Botës më 17 qershor. Sipas kalendarit, më 23 qershor do të përballet me Ganën, ndërsa më 27 qershor do të luajë ndeshjen e fundit të fazës së grupeve kundër Panamasë.