Janë zyrtarizuar kandidatët që do të garojnë për postin e Prokurorit të Përgjithshëm, një proces i hapur nga Këshilli i Lartë i Prokurorisë, pasi në dhjetor i mbaron mandati Olsian Çelës. Sipas burimeve bëhet e ditur se prokurori i Elbasanit, Kreshnik Ajazi, i cili fillimisht kishte dorëzuar dokumentacionin pranë KLP-së për të qenë pjesë e garës, është tërhequr nga kandidatura.
Pas këtij zhvillimi, në garë mbeten pesë kandidatë për drejtimin e Prokurorisë së Përgjithshme, Fatjona Memçaj, prokurore në Eurojust në mandatin e dytë, Arta Marku, ish-Prokurore e Përgjithshme e përkohshme, Ylli Pjetërnika, Rovena Bozo, prokurore në Tiranë si dhe Adnan Xholi, prokuror në SPAK. Pas verifikimit të kandidaturave dhe përfundimit të procedurave të vlerësimit, KLP do t'i propozojë Kuvendit listën e kandidatëve, ndërsa Prokurori i Përgjithshëm do të zgjidhet me shumicën e cilësuar të votave, sipas përcaktimeve kushtetuese.
