Për të pestën ditë radhazi, zjarri i madh që filloi në Beoti është përhapur edhe në Atikën Perëndimore, ku po bën kërdinë, duke djegur mbi 130,000 hektarë. Zjarrfikësit po përballen me vështirësi, pasi erërat po faforizojnë përhapjen e flakëve.
Sipas mediave greke, përpjekjet për shuarjen e zjarrit janë përqendruar në tre zona kryesore: në veri-verilindje pranë Psathës, në jugperëndim mes Psathës dhe Loumpës, si dhe në jug, pranë Kandilit në Megara.
Gjatë gjithë natës, zjarrfikësit dhe vullnetarët punuan për të izoluar vatrat e zjarrit. Në terren po operojnë gjithashtu 450 zjarrfikës, 126 automjete zjarrfikëse dhe 22 ekipe në këmbë. Në operacion janë përfshirë edhe dhjetëra vullnetarë me mjete ujore.
Nga ajri, në shuarjen e flakëve po marrin pjesë 34 mjete fluturuese, mes tyre 23 avionë dhe 11 helikopterë, tre prej të cilëve përdoren për koordinimin e operacionit. Makineri të rënda po hapin breza mbrojtës për të ndaluar përhapjen e zjarrit, ndërsa në operacion po ndihmojnë edhe Forcat e Armatosura greke.
