Mbi 2.6 ton kokainë janë sekuestruar në Oqeanin Atlantik gjatë një operacioni të madh ndërkombëtar kundër trafikut të drogës. Operacioni që u zhvillua në kuadër të një hetimi të koordinuar nga Drejtoria Anti-Mafia e Distriktit të Brescias, me pjesëmarrjen e Guardia di Finanza, autoriteteve spanjolle dhe atyre portugeze, çoi në arrestimin e katër personave. Gjatë operacionit u ndalua një gomone me shpejtësi të lartë pranë brigjeve të Lisbonës nga Policia Detare Portugeze. Mjeti lundrues përdorej për transportimin e sasive të mëdha të drogës drejt tregut europian. Sipas mediave të huaja, të arrestuarit ishin dy shtetas spanjollë, një shtetas nga Gjibraltari dhe një shtetas shqiptar, i cili banonte në Mantua dhe kishte vendbanim në provincën e Brescias. Operacioni u bë i mundur falë bashkëpunimit ndërkombëtar mes strukturave policore të Italisë, Spanjës dhe Portugalisë.
Në hetime kontribuan edhe Qendra e Analizës dhe Operacioneve Detare për Narkotikët (MAOC-N), me seli në Lisbonë, si dhe Drejtoria Qendrore për Shërbimet Kundër Drogës. Gjatë operacionit, gomonia u mbajt nën vëzhgim nga avionët e Guardia di Finanza, të pajisur me sisteme moderne të mbikëqyrjes detare. Avionët ishin vendosur në Spanjë si pjesë e operacioneve për kontrollin e kufijve të jashtëm të Bashkimit Europian. Sipas vlerësimeve të hetuesve, ngarkesa e sekuestruar kishte një vlerë rreth 78 milionë euro në tregun me shumicë. Nëse droga do të shpërndahej me pakicë në tregun europian, ajo mund të kapte fitime që arrijnë deri në 500 milionë euro.
Hetimet kanë zbuluar gjithashtu se organizatat kriminale po përdorin gjithnjë e më shumë të ashtuquajturat "go-fasts", gomone me gjatësi nga 10 deri në 16 metra, të pajisura me disa motorë të fuqishëm. Këto mjete përdoren për të marrë në det ngarkesat e drogës nga të ashtuquajturat anije mëmë, që vijnë nga Amerika e Jugut dhe më pas i transportojnë drejt brigjeve europiane, duke shmangur kontrollet dhe duke lehtësuar hyrjen e lëndëve narkotike në tregun e BE.
