Jessica Simpson është gati të rikthejë jetën dhe karrierën e saj në qendër të vëmendjes. Këngëtarja e hitit “Take My Breath Away” ka konfirmuar se Netflix do të realizojë një dokumentar për jetën, karrierën dhe ndikimin e saj në industrinë e muzikës dhe argëtimit, i cili pritet të publikohet në vitin 2027.
“Është koha për të hapur një kapitull të ri”, shkroi Simpson në Instagram më 23 gusht, krahas një fotografie ku shfaqet ulur përpara një ekipi kamerash. Në postimin e saj ajo etiketoi Netflix dhe shkroi thjesht: “2027”.
Simpson nuk ka lejuar kamera të ndjekin jetën e saj në këtë mënyrë prej rreth 20 vitesh, që nga koha kur luajti së bashku me bashkëshortin e atëhershëm, Nick Lachey, në reality show-n “Newlyweds: Nick and Jessica”. Seriali dokumentonte jetën e çiftit dhe e shndërroi marrëdhënien e tyre në një nga historitë më të komentuara të televizionit të asaj kohe.
Që prej atëherë, Jessica Simpson ka shitur më shumë se 20 milionë albume në mbarë botën, ka ndërtuar një biznes të suksesshëm me “The Jessica Simpson Collection” dhe ka publikuar autobiografinë bestseller “Open Book”.
Dokumentari i ri vjen në një moment të rëndësishëm në karrierën e saj. Pas një pauze 15-vjeçare nga muzika origjinale, Simpson iu rikthye regjistrimit dhe performancave me dy EP-të “Nashville Canyon”, të publikuara në vitin 2025.
Netflix ka bërë të ditur se në këtë dokumentar këngëtarja do të lejojë sërish kamerat të hyjnë në jetën e saj për të treguar historinë e saj nga një këndvështrim më personal.
Projekti do të drejtohet nga Joe Pearlman dhe pritet të shfaqet në Netflix gjatë vitit 2027. Platforma ka bërë të ditur se detaje të tjera rreth dokumentarit do të publikohen në muajt në vijim.
Për Simpson, rikthimi në muzikë ka ardhur pas një periudhe të vështirë personale dhe profesionale. Ajo ka treguar se vitet e kaluara në Nashville e ndihmuan të rilidhej me veten dhe të gjente sërish pasionin për muzikën.
“E dua Nashville-in. Ai më riktheu te vetja dhe te zemra ime në një periudhë shumë të vështirë të jetës”, është shprehur ajo gjatë një koncerti në Connecticut në dhjetor të vitit 2025.
