Kardiokirurgu Edvin Prifti ka njoftuar se produkti i quajtur “Spike Protect” ka marrë miratimin rregullator të Komunitetit Europian dhe se pritet të jetë i disponueshëm në tregun europian brenda javëve të ardhshme.
Përmes një postimi në rrjetet sociale, Prifti bën me dije se “Spike Protect” është një molekulë biologjike, e ideuar prej tij, e cila, sipas tij, synon të neutralizojë efektet e proteinës Spike të prodhuar nga Covid-19, si edhe të asaj që lidhet me vaksinat kundër virusit.
Ai shprehet se për vite me radhë është pyetur nga qytetarët për këtë produkt, por nuk ka preferuar ta rekomandojë pa u përmbyllur procesi i miratimit rregullator.
Sipas Priftit, pas daljes në treg, “Spike Protect” do të jetë i disponueshëm në të gjithë Europën, përfshirë edhe Shqipërinë. Ai shton se shpreson që produkti të ndihmojë në parandalimin e komplikacioneve të lidhura me Covid-19 dhe, sipas pretendimeve të tij, edhe të komplikacioneve nga vaksinat, si dhe të jetë në ndihmë të personave që vuajnë nga long Covid.
Në fund të postimit, Prifti falënderon kompanitë Zion Pharmaceutical dhe Martinez Nieto S.A. për bashkëpunimin në zhvillimin e produktit, duke theksuar se ka kërkuar që çmimi i tij të jetë sa më i përballueshëm, në mënyrë që të mund të përdoret nga sa më shumë njerëz.
