Gjykata e Fierit ka konfiskuar pasuri me vlerë rreth 1.8 milionë euro të shtetasit Arbër Muça, pasi prokuroria konstatoi se ato nuk justifikoheshin me burime të ligjshme. Sipas Prokurorisë së Fierit, analiza financiare zbuloi një disproporcion të konsiderueshëm mes pasurisë së krijuar nga Arbër Muça dhe të ardhurave të ligjshme të provuara.
Hetimi evidentoi gjithashtu se një pjesë e pasurive, megjithëse figuronin në emër të personave të tjerë, dyshohet se kontrolloheshin dhe administroheshin në mënyrë faktike prej tij, me qëllim fshehjen e pronarit real dhe origjinës së fondeve. Me vendim gjykate, në pronësi të shtetit kaluan disa pasuri të paluajtshme në Fier dhe Tiranë, përfshirë truall, apartamente, ambiente biznesi dhe vendparkime. Po ashtu u konfiskuan 12 automjete, mes tyre një Lamborghini Urus, një Mercedes-Benz G63 AMG, Audi RS Q8, Audi S8, Audi Q7, dy BMW X5, si dhe mjete të tjera.
Vendimi përfshin edhe konfiskimin e disa llogarive bankare në euro dhe lekë, me dhjetëra mijëra euro dhe miliona lekë të bllokuara. Ndërkohë, hetimet vijojnë për veprën penale të "Pastrimit të produkteve të veprës penale ose veprimtarisë kriminale", pasi Prokuroria bën me dije se janë evidentuar edhe pasuri të tjera me vlerë të konsiderueshme.
