Tre anije tregtare të huaja që lundronin në Detin e Zi u sulmuan nga dronë rusë. Kështu ka raportuar zëvendëskryeministri ukrainas dhe ministri iRehabilitimit dhe Zhvillimit të Komuniteteve dhe Territoreve, Oleksiy Kuleba.
Në një postim në Telegram, Kuleba tha se gjatë natës, dronët sulmuan tre anije tregtare të huaja që operonin në korridorin detar. Sulmet shkaktuan zjarre në anije, të cilat u shuan nga ekuipazhet.
Sipas tij, dy anëtarë të ekuipazhit të një anijeje në pronësi turke me flamur të Vanuatu-s u plagosën lehtë dhe morën ndihmë mjekësore, ndërsa anija u tërhoq për riparime.
Ministri ukrainas theksoi se, pavarësisht sulmeve të vazhdueshme ruse, Ukraina vazhdon të ruajë funksionimin e korridorit detar të eksportit.
“Pavarësisht sulmeve të vazhdueshme ruse, Ukraina vazhdon të ruajë funksionimin e korridorit detar dhe portet së bashku me ekuipazhet vazhdojnë të sigurojnë transportin e mallrave dhe sigurinë globale ushqimore”, tha ai.
Këto incidente rrisin shqetësimet në lidhje me sigurinë e lundrimit në Detin e Zi, pasi rajoni mbetet kritik për eksportet ukrainase të drithërave dhe mallrave të tjera në tregjet ndërkombëtare.
