Sekretari i Përgjithshëm i Ministrisë së Arsimit, Erzen Tola, është larguar nga detyra pas dorëheqjes së tij, vendim që vjen pas rekomandimeve të Kontrollit të Lartë të Shtetit (KLSH).
Sipas informacioneve paraprake, KLSH kishte kërkuar largimin e Tolës nga funksioni, pasi në auditimet e kryera kishte konstatuar shkelje në ushtrimin e detyrës. Në raportin më të fundit thuhet se ai nuk ka ndjekur në mënyrë të plotë zbatimin e vendimeve të Gjykatës së Lartë për punonjësit e larguar nga detyra, si edhe nuk ka siguruar kontroll efektiv mbi shpenzimet e karburantit, duke shkaktuar dëme financiare në buxhetin institucional.
Erzen Tola ishte emëruar fillimisht gjatë drejtimit të ministrisë nga Ogerta Manastirliu dhe e kishte vijuar detyrën edhe më pas. Sipas raportimeve, rekomandimet e KLSH për largimin e tij nuk ishin zbatuar më herët. Dorëheqja e tij vjen pas publikimit të gjetjeve të auditimit të Kontrollit të Lartë të Shtetit.
