Vatra e zjarrit në zonën e Tërbunit në Pukë po vijon prej tre ditësh, ndërsa flakët janë përhapur me shpejtësi, të favorizuara edhe nga erërat e forta. Situata në terren mbetet problematike, pasi zjarri po kërcënon një banesë, si dhe stacionin rezervë të furnizimit me ujë të qytetit të Pukës.
Forcat zjarrfikëse dhe strukturat e angazhuara në terren po vijojnë përpjekjet për izolimin dhe vënien nën kontroll të flakëve. Megjithatë, ndërhyrja është vështirësuar ndjeshëm për shkak të terrenit të thyer malor dhe kushteve atmosferike.
Për izolimin e flakëve është kërkuar edhe ndërhyrje nga ajri, me qëllim frenimin e përhapjes së zjarrit dhe shmangien e rrezikut për banesat dhe infrastrukturën e furnizimit me ujë. Ndërkohë, Forcat në terren vijojnë operacionin për izolimin e vatrave, ndërsa situata po monitorohet në mënyrë të vazhdueshme.
