Tatiana Diaz, 29 vjeçe, po pushonte në shtëpi, duke shijuar TikTok, kur një ankand për diamante i tërhoqi vëmendjen. Një prezantuese po tregonte diamante të prodhuara në laborator.
Pak minuta më vonë, Diaz kishte blerë një diamant 2.58 karatësh, duke ofruar radhazi 100 dollarë, 200 dollarë dhe në fund 300 dollarë. "Nuk kisha interes të blija asgjë", - pranon ajo. Burri i saj tani planifikon ta vendosë gurin në një bizhuteri për ditëlindjen e saj.
Ryan Roth, 28 vjeç, pati një përvojë të ngjashme, duke hasur në një ankand që zhvillohej LIVE dhe që e bëri të blinte një diamant 4-karatësh për 700 dollarë. “E fitova rastësisht”, thotë ai. “Është kaq e lehtë, si të luash në një makinë lojërash fati.” Ai vlerëson se ka mbledhur rreth 25 diamante nga ankandet e TikTok.
Blerje dhe argëtim online
Në 6 muajt e fundit, dhjetëra llogari kanë filluar transmetimin e drejtpërdrejtë të ankandeve të diamanteve. Shitësit paraqesin gurët së bashku me certifikatat e tyre dhe fillojnë një numërim mbrapsht, zakonisht 20 sekonda. Oferta më e lartë fiton, me çmimin fillestar që fillon nga vetëm 1 dollar.
Procesi kombinon blerjet online me argëtimin. Por ekspertët paralajmërojnë për rreziqet. “Ankandet e TikTok nuk të japin kohë të mjaftueshme që të vlerësosh gurët”, - shpjegon vlerësuesja e gurëve të çmuar Amy Wyer . “Dy gurë mund të duken pothuajse identikë në letër, por mund të jenë dukshëm të ndryshëm nga afër.”
Chuck Marks, pronar i një dyqani bizhuterish, gjithashtu duket skeptik. "Pse të blesh një mollë të skuqur kur ka kaq shumë mollë të bukura në të njëjtën arkë?" pyet veten ai.
Certifikatat nuk e tregojnë gjithmonë të vërtetën
Cilësia e diamanteve të krijuar në laborator vlerësohet në bazë të prerjes, simetrisë, ngjyrës, qartësisë dhe peshës së tyre. Megjithatë, edhe gurët me certifikime identike mund të ndryshojnë shumë në pamje.
Marks tregoi 3 diamante që peshonin rreth 3 karat me klasifikime identike. I pari ishte i ndritshëm dhe i pastër, i dyti ishte gri dhe i treti kishte një nuancë të gjelbër. Sipas tij, shumë klientë që blejnë diamante përmes TikTok zhgënjehen kur i shqyrtojnë nga afër.
Disa gurë kanë gjithashtu përmasa të pazakonta prerjeje, gjë që e bën vendosjen e tyre në bizhuteri të vështirë dhe të kushtueshme.
Një treg miliarda dollarësh
Shitjet globale të diamanteve të krijuar në laborator pritet të kalojnë 8 miliardë dollarë deri në vitin 2024, sipas analistit Edan Golan. Rritja e tregut përkoi me zgjerimin e TikTok Shop, i cili filloi në vitin 2023.
Yoni Rabinovich, 25 vjeç, themeloi “House of Diamonds” tre muaj më parë, e cila transmeton ankande 14 deri në 15 orë në ditë. Shumë shikues, shpjegon ai, shikojnë vetëm për argëtim, pa blerë asgjë.
Çmimet në TikTok zakonisht variojnë midis 100 dhe 200 dollarëve për karat, sipas “The Guardian”. Megjithatë, shndërrimi i një guri në bizhuteri mund të kushtojë më shumë sesa vetë diamanti, veçanërisht duke pasur parasysh çmimin e lartë të arit.
Pavarësisht rezervave, blerësit e shohin si një alternativë të përballueshme. "Është një mundësi e mirë për ata që nuk duan të shpenzojnë shumë para ose për çiftet e reja që martohen ", thotë Diaz.
Roth, nga ana e tij, vazhdon të mbledhë diamante, duke pritur momentin e duhur për t'i përdorur ato. "Është pak a shumë si të mbledhësh kukulla Barbie", thotë ai. /Marrë nga New York Times, LAPSI.al
