Gjykata e Fierit ka caktuar masat e sigurisë për tre vajzat e përfshira në dhunimin e një bashkëmoshatareje, ngjarje që shkaktoi reagime të forta pasi pamjet u publikuan në rrjetet sociale. Me kërkesë të Prokurorisë, masa "Arrest me burg" është caktuar për shtetasen L.L., "Arrest në shtëpi" për të miturën K.G., ndërsa për të miturën M.R. gjykata ka vendosur "Shtrim të përkohshëm në një institucion psikiatrik".
Të treja dyshohen për veprën penale "Heqja e paligjshme e lirisë", kryer në bashkëpunim. Sipas Prokurorisë, hetimet kanë siguruar prova që ngrejnë dyshime të arsyeshme për përfshirjen e tyre në ngjarje. Prokuroria bëri thirrje që të mos publikohen pamje apo të dhëna që mund të çojnë në identifikimin e të miturve, duke theksuar se mbrojtja e privatësisë dhe e të drejtave të tyre është një detyrim ligjor. Ndërkohë, hetimet vijojnë për zbardhjen e plotë të rrethanave të ngjarjes.
