Një sezon i ri Europian starton të mërkurën, me raundin e parë të Europa League, me 36 ekipe që premtojnë beteja të vërteta në rrugën drejt Frankfurtit, ku në 26 maj 2027 do të luhet finalja. Kështu, të mërkurën e të enjten skena europiane e futbollit është e gjitha për kupën e dytë të UEFA-s. Kjo, për efekt të formatit të ri të aplikuar prej dy vitesh nga institucioni që drejton futbollin kontinental, që ka zgjedhur të diskutojë vetëm raundin e parë të turneut këtë mesjavë, duke e bërë arenën e përplasjeve kontinentale.
Skuadrat për tu mundur
Europa League ka pretendentët e saj mes 36 skuadrave pjesëmarrëse, por natyrisht që dy gjigantët italianë Milan e Juventus janë skuadrat për tu mundur. Kuqezinjtë e teknikut Ruben Amorim debutojnë në San Siro kundër Benfikës, në një 90 minutësh drithërues për të vendosur që në fillim supremacitë. Ruben Amorim ka në mendje, për ndeshjen e parë në Europa League, një formacion titullar tashmë gati për t’iu vërsulur kundërshtarit, shumë ofensiv dhe sigurisht dinamik. Do të jetë një Milan i shpejtë, me lojtarë që dinë të kalojnë kundërshtarin në duelet një kundër një, por duhet të jetë gjithashtu një Milan i aftë të vuajë, sepse portugezët dinë ta mbajnë topin dhe, për rrjedhojë, në fazën pa top do të ketë shumë vrapim.
Amorim kundër të kaluarës
Megjithatë, nëse Amorim u duk i befasuar nga Lazio në pjesën e parë, e njëjta gjë nuk mund të thuhet kundër Benfikës, një skuadër që ai e njeh shumë mirë dhe me të cilën është përballur 13 herë gjatë karrierës së tij mes Bragës dhe Sporting Lisbonës, me një bilanc më shumë se të kënaqshëm prej gjashtë fitoresh, katër humbjesh dhe tre barazimesh. Këtë herë, megjithatë, niveli ngrihet. Është e vërtetë që Europa League është e gjatë dhe nuk është e nevojshme të fitosh të gjitha ndeshjet (me 16 pikë, kualifikimi në fazën e 1/8-ve është pothuajse i sigurt), por është po aq e pamohueshme se kurrë më parë në këtë moment Milan ka nevojë për një paraqitje në lartësinë e emrit të tij.
Si funksionon formati
Sa i përket kalendarit, faza kampionat e Europa League do të mbyllet në janar, ndërsa ajo e Conference League, ku do të jetë edhe Egnatia, starton në mesin e tetorit për tu mbyllur në dhjetor. Çdo skuadër në Europa League do të zhvillojë gjithsej 8 ndeshje në këtë fazë, duke u përballur me tetë kundërshtarë të ndryshëm, me një renditje të vetme, ndërsa në Conference do të luajë vetëm 6 ndeshje. Sidoqoftë, në të dy turnetë, tetë skuadrat e para të renditura do të shkojnë direkt në 1/8 e kompticionit, ndërsa nga vendi i 9 në të 24 do të luajnë një ndeshje playoff-i për të përcaktuar tetë skuadrat e tjera të kualifikuara. Këtë mesjavë nis një sezon i gjatë për 72 skuadra në total, por në fund të të dy turneve vetëm dy do tja dalin të ngrenë trofetë: kush do të triumfojë në Frankfurt dhe Stamboll? Koha do ta tregojë...
Europa League - League Stage
18:45 Ararat Armenia - Sparta Prague
18:45 Omonia Nicosia - Celta Vigo
21:00 AC Milan - Benfica
21:00 Anderlecht - Lyon
21:00 Bayer Leverkusen - NK Celje
21:00 Hapoel Beer Sheva - Dinamo Zagreb
21:00 Olympiacos - Jagiellonia Bialystok
21:00 Sturm Graz - Rennes
21:00 Sunderland - AZ Alkmaar
