Benjamin Netanyahu i është ankuar Donald Trump për retorikën anti-Izrael në rritje të Presidentit turk Rexhep Taip Erdogan. Lajmin e konfirmuan për agjencinë Axios zyrtarë izraelitë dhe amerikanë.
Sipas të njëjtave burime, kryeministri izraelit i kërkoi Trump, në një telefonatë të premten, të shmangte shitjen e sistemeve të armëve që do të ndihmonin Turqinë të modernizonte forcën e saj ajrore.
Axios raporton se Netanyahu iu ankua Trumpit për Erdoganin dhe tregoi se donte që presidenti amerikan ta frenonte udhëheqësin turk.
“Netanyahu bëri një kërkesë dhe presidenti e dëgjoi. Pra, presidenti mund t’i përcjellë [Erdoganit] një mesazh si: “A mund ta marrësh pak më lehtë këtë çështje?” Kështu është puna”, tha një zyrtar amerikan.
Trump dhe Erdogan do të takohen gjatë Samitit të NATO-s të martën dhe të mërkurën në Ankara.
Axios vëren se mes tensioneve midis Izraelit dhe Turqisë gjatë dy viteve të fundit, Trump ka mbajtur marrëdhënie të ngushta me të dy udhëheqësit. Megjithatë, shton Axios, pozicioni i Netanyahut në Uashington është dobësuar muajt e fundit për shkak të luftës me Iranin.
Nuk është e qartë se sa ndikim ka ende Netanyahu, si për shkak të marrëdhënies së ngushtë të Trump me Erdoganin, ashtu edhe për shkak të përfitimeve ekonomike të shitjes së armëve nga SHBA-të në Turqi. ©LAPSI.al
