Lufta kundër krimit transnacional, trafikut të narkotikëve dhe migracionit të paligjshëm është ndër përparësitë kryesore të administratës së Presidentit të Shteteve të Bashkuara, Donald Trump.
Këtë mesazh e përcolli Ambasada Amerikane në Tiranë pas takimit të ambasadorit Eric Wendt me drejtuesit e Strukturës së Posaçme Kundër Korrupsionit (SPAK).
Sipas Ambasadës, gjatë takimit u diskutua roli vendimtar i institucioneve të pavarura në përballjen me këto sfida, si dhe rëndësia e bashkëpunimit mes Shqipërisë dhe Shteteve të Bashkuara në fushën e sigurisë dhe luftës kundër krimit.
“Partneriteti ynë kontribuon për një të ardhme më të sigurt e më të begatë për të dy kombet tona”, theksohet në mesazhin e Ambasadës Amerikane.
Takimi vjen në kuadër të bashkëpunimit të vazhdueshëm shqiptaro-amerikan për forcimin e institucioneve të zbatimit të ligjit dhe përballimin e formave të krimit që tejkalojnë kufijtë kombëtarë.
