Aktorja franceze Eva Green është dërguar me urgjencë në spital pasi pësoi një aksident gjatë xhirimeve të sezonit të tretë të serialit të Netflix, "Wednesday".
Sipas raportimeve të mediave britanike, 45-vjeçarja, e njohur për rolin e Vesper Lynd në filmin "Casino Royale", u lëndua në këmbë gjatë xhirimeve pranë Dublinit, në Irlandë.
Burime pranë produksionit kanë bërë të ditur se incidenti ishte serioz dhe se xhirimet u ndërprenë përkohësisht.
"Ishte një aksident i rëndë. Eva kishte dhimbje të forta dhe producentët nuk donin të rrezikonin. Mjekët mbërritën menjëherë në vendngjarje dhe ajo u transportua në spital për trajtim," tha një burim për The Sun.
Sipas të njëjtit burim, aktorja ka marrë trajtimin e nevojshëm dhe tashmë po rikuperohet mirë. Ndërkohë, xhirimet e serialit kanë rifilluar gjatë këtij muaji.
Eva Green do të debutojë në sezonin e tretë të "Wednesday", i cili sjell edhe emra të rinj në kast, përfshirë Lena Headey, James Lance, Andrew McCarthy, Winona Ryder, Noah Taylor, Oscar Morgan, Kennedy Moyer dhe Chris Sarandon.
Seriali, me protagoniste Jenna Ortega në rolin e Wednesday Addams, mbetet një nga prodhimet më të suksesshme të Netflix. Sezoni i tretë është në fazën e xhirimeve dhe ende nuk ka një datë zyrtare publikimi.
Deri më tani, përfaqësuesit e Eva Green dhe Netflix nuk kanë komentuar mbi incidentin.
