Rreth 100 kilogramë kokainë janë sekuestruar në aeroportin e Athinës gjatë një operacioni të përbashkët të policisë greke dhe agjentëve të DEA-s amerikane. Operacioni u zhvillua mbrëmjen e së mërkurës dhe gjatë tij u ndaluan gjashtë persona. Sipas të dhënave paraprake, të paktën katër prej tyre dyshohet se janë shtetas shqiptarë.
Kokaina ishte fshehur në një ngarkesë me trëndafila të freskët, e cila kishte mbërritur në Greqi nga Kolumbia. Autoritetet po hetojnë rrjetin e përfshirë në trafik, pasi dyshohet se grupi mund të ketë edhe anëtarë të tjerë. Hetimet vijojnë për identifikimin e personave të tjerë të përfshirë dhe për të përcaktuar destinacionin final të drogës.
