Një thikë artizanale është zbuluar në burgun e Fierit e cila dyshohet se do të përdorej për një sulm ndaj të burgosurit Denis Bajri, i njohur edhe si Brajovic.
Bajri ka deklaruar para hetuesve se ndaj tij është tentuar një sulm brenda qelisë dhe se pas ngjarjes qëndron Ibrahim Liçi. Sipas dëshmisë së tij, Aldo Gjini ka hyrë në qeli së bashku me Jurgen Zotaj dhe pas një telefonate të Liçit, ky i fundit ka tentuar ta godiste me thikë.
“Aldo Gjini kërkoi të më takonte. Erdhi në qelinë time bashkë me Jurgen Zotajn. Zotaj më dha një telefon; në linjë ishte Ibrahim Liçi. Liçi më tha në telefon: “Jeta jote kaq e pati”. Në ato momente, Zotaj tentoi të më sulmonte me thikë”, tha ai.
Gjatë përleshjes, Bajri dhe Zoto, mbetën të plagosur dhe morën ndihmë mjekësore. Pas incidentit, tetë punonjës të policisë së burgut janë përjashtuar dhe rasti është referuar në Prokurori për shpërdorim detyre.
Autoritetet po hetojnë se si të dënuarit kanë pasur mundsinë të lëvizin nga një godinë në tjetrën dhe si është futur një telefon në qeli, pasi përdorimi i tij është i ndaluar. Dy të burgosur janë izoluar për tre muaj dhe janë transferuar në burgje të tjera.
