Gjykata e Apelit me Juridiksion të Përgjithshëm Tiranë ka vendosur riçeljen e hetimit gjyqësor për kryerjen e dy raporteve individuale psikologjike për Mario Përlleshajn dhe Luis Meçajn.
Këtë të mërkurë seanca u shty ndërsa më 10 qershor, në sallën e gjyqit do të paraqitet psikologia që do të ngarkohet me hartimin e raporteve.
Më 9 dhjetor 2025, Gjykata e Tiranës dënoi Mario Pëlleshajn me 16 vite burg për vrasjen e Martin Canit. Ai u shpall fajtor për veprat penale të “vrasjes në rrethana të tjera cilësuese” ndaj Martin Canit dhe “vrasjes në rrethana të tjera cilësuese, mbetur në tentativë” ndaj një të mituri tjetër, i cili mbeti i plagosur.
Për vrasjen e Martin Canit, Gjykata e Tiranës caktoi dënimin me 12 vite burg, ndërsa për tentativën e vrasjes së të miturit tjetër vendosi 10 vite burg. Pas bashkimit të dënimeve, Pëlleshaj u dënua përfundimisht me 16 vite heqje lirie.
Ngjarja e rëndë ndodhi më 18 nëntor 2024, pas një konflikti mes të miturve që kishte nisur në shkollën 9-vjeçare “Fan Noli” në Tiranë.
