Një vatër zjarri ka përfshirë zonën me kallamishte pranë plazhit të Tales, në Lezhë, duke djegur një sipërfaqe të konsiderueshme. I favorizuar nga era e fortë, zjarri është përhapur me shpejtësi përgjatë vijës bregdetare, në një gjatësi që vlerësohet nga rreth 500 metra deri në 1 kilometër.
Në vendngjarje kanë ndërhyrë forcat zjarrfikëse të Lezhës, të cilat po hasin vështirësi për shkak të terrenit. Prania e kënetave mes plazhit dhe vatrës së zjarrit e bën të pamundur afrimin e mjeteve zjarrfikëse pranë flakëve.
Në afërsi të zonës së prekur ndodhen disa biznese dhe struktura turistike, ndaj ekipet e emergjencës janë vendosur në gatishmëri për të ndërhyrë menjëherë nëse zjarri afrohet drejt tyre. Përfaqësuesi i Drejtorisë së Përgjithshme të Shërbimit të Mbrojtjes nga Zjarri dhe Shpëtimit, Agustin Pepkolaj, deklaroi se pavarësisht përhapjes së zjarrit dhe erës së fortë, deri tani është bërë e mundur lokalizimi i flakëve dhe nuk paraqitet rrezik për banesat apo bizneset në zonë.
