Në Shqipëri, protestat nuk po ndalen edhe pas dy muajsh nga fillimi i demonstratave kundër një projekti turistik luksoz të lidhur me biznesmenin Jared Kushner, dhëndrin e presidentit amerikan Donald Trump, i planifikuar në ishullin e Sazanit dhe në zonën e mbrojtur të Zvërnecit, pranë lagunës së Nartës, e njohur për praninë e flamingove rozë.
Jo vetëm mjedisi
Çdo mbrëmje, në Tiranë zhvillohen marshime dhe tubime të përhershme, të udhëhequra kryesisht nga të rinjtë, të cilët janë bërë forca kryesore e "Revolucionit të Flamingove".
Lëvizja nuk ka më në qendër vetëm çështjet e ndërtimit dhe mbrojtjes së mjedisit, por është shndërruar në një protestë kundër: korrupsionit, mungesës së transparencës në investimet strategjike, largimit masiv të të rinjve, dhe shpopullimit të Shqipërisë.
Dy ditë më parë, përpara godinës së Parlamentit, disa protestues u përplasën me policinë, duke shkaktuar disa të plagosur.
Edi Rama: "Thelbësor për ringritjen e Shqipërisë"
Kryeministri Edi Rama ka mbrojtur me vendosmëri projektin në disa deklarata publike, duke e cilësuar atë si një hap të rëndësishëm për ta shndërruar Shqipërinë në një destinacion turistik të nivelit botëror.
Ai ka siguruar gjithashtu se objektet turistike do të ndërtohen duke respektuar standardet evropiane për mbrojtjen e mjedisit.
Shqetësimi i ipeshkvijve
Ipeshkvijtë katolikë të Shqipërisë po ndjekin nga afër zhvillimet në vend.
Në një deklaratë të muajit qershor, Konferenca Ipeshkvnore e Shqipërisë theksoi se: "Çdo zhvillim në vend duhet të marrë parasysh mbrojtjen e mjedisit, si dhe respektimin e pronës së tjetrit."
Duke cituar Papa Françeskun në enciklikën Laudato si', deklarata kujton: "Parashikimi i ndikimit mjedisor të ndërmarrjeve dhe projekteve kërkon procese politike transparente dhe të hapura ndaj dialogut. Ndërsa korrupsioni, i cili fsheh ndikimin e vërtetë mjedisor të një projekti në këmbim të favoreve, çon shpesh në marrëveshje të errëta që shmangin detyrimin për informim dhe debat të thelluar."
Në këtë frymë, ipeshkvijtë kërkojnë që të mos mohohen: vlerësimi i ndikimit, konsultimi, dhe pjesëmarrja e komuniteteve lokale që jetojnë në zonë, si edhe e organizatave që merren me mbrojtjen e mjedisit.
Sipas tyre: "Për ne, kjo quhet zhvillim integral, i cili duhet të marrë parasysh të gjitha dimensionet e jetës njerëzore, si ato individuale ashtu edhe ato komunitare."
Të dëgjohet zëri i popullit
Konferenca Ipeshkvnore theksoi gjithashtu se pjesëmarrja e madhe e të rinjve dhe familjeve në protesta tregon pakënaqësinë ndaj sistemit aktual politik.
Në deklaratë thuhet: "Nuk i takon Kishës të gjejë zgjidhje politike, por të udhëheqë ndërgjegjet. Jemi të bindur se zëri i popullit duhet të dëgjohet dhe të merret në konsideratë."
Sipas ipeshkvijve, është detyrë e politikës të gjejë zgjidhje brenda kuadrit demokratik.
Ata shtojnë: "Këto janë rregullat e demokracisë evropiane, të cilës ne synojmë t'i bashkohemi. Zëri i kaq shumë njerëzve, të cilët kërkojnë vetëm mirëqenien e familjeve të tyre dhe të shoqërisë, dhe që shprehin pakënaqësinë për veprimet ose mosveprimet e politikanëve, nuk mund të shpërfillet."
