Katër vatra zjarri vijojnë të jenë aktive në vend, ndërsa gjashtë të tjera po mbahen nën monitorim. Sipas Ministrisë së Mbrojtjes, deri në orën 17:00 të 22 gushtit janë evidentuar gjithsej 10 vatra.
Situata është përmirësuar ndjeshëm në zonën Gojan–Gjegjan të Pukës. Vatrat në Gjegjan, Gojan të Vogël dhe Gojan të Madh janë izoluar, ndërsa forcat në terren po kontrollojnë vijën e zjarrit për të shmangur riaktivizimet.
Në Prozhem të Pukës, zjarri vijon në një sipërfaqe pyjore. Era po favorizon flakët, por aktualisht nuk rrezikohen banesat. Aktive mbetet edhe vatra në Shtanë–Tenë të Mirditës, ku po punojnë forcat vendore dhe efektivët e Forcave të Armatosura.
Në malin e Dajtit vijon ndërhyrja nga toka dhe ajri. Në operacion janë angazhuar zjarrfikës, efektivë të Forcave të Armatosura, një helikopter dhe dy avionë Air Tractor. Nuk raportohet rrezik për zonat e banuara. Ndërkohë, zjarri në Dukat është shuar plotësisht. Në operacionet e zhvilluara gjatë ditës janë angazhuar mbi 300 forca, të mbështetura nga mjete zjarrfikëse, tre helikopterë dhe dy avionë Air Tractor.
