Makina në të cilën Princesha Diana u shfaq e veshur me "fustanin e hakmarrjes" i bërë i famshëm pas zbulimit të marrëdhënies mes Princit të atëhershëm, tani Mbretit Charles, dhe Camilla-s, është shitur në ankand për 66 250 £.
Në qershor të vitit 1994, Diana doli nga Jaguar XJ40 i saj e veshur me këtë fustan ikonik, vetëm disa orë pasi Charles pranoi në një intervistë televizive lidhjen e tij jashtëmartesore me Camilla Parker Bowles.
Më shumë se tre dekada më vonë, Jaguar-i klasik u shit për në një ankand të mbajtur në jug të Oxfordshire.
Organizatorët thanë se automjeti u ble nga një koleksionist në Mbretërinë e Bashkuar për 16 herë më shumë se vlerësimi fillestar, duke vendosur një rekord të ri për një Jaguar XJ.
Nga kjo makinë Diana doli e veshur me një fustan mbrëmjeje prej mëndafshi të zi të bërë me porosi, me shpatulla të zbuluara. Ai hyri në histori si "fustani i hakmarrjes" pasi asnjëherë më parë një princeshë nuk kishte dalë aq e zhveshur.
Përpara ankandit, drejtori ekzekutiv i The Market, Mark Livesey, tha: “Nga njëra anë është një Jaguar i vitit 1994 dhe nga ana tjetër është një ish-makinë mbretërore e përdorur nga Princesha Diana e ndjerë.”
Ai shpjegoi se Diana e përdori automjetin për rreth 3 vjet, deri në vdekjen e saj në vitin 1997, dhe ai “luajti një rol në disa nga momentet e saj më të famshme”.
“Ishte makina të cilën ajo ngiste nëpër Londër dhe Mbretërinë e Bashkuar dhe doli prej saj e veshur me “fustanin e hakmarrjes” pas rrëfimit të Charles në media më herët atë ditë”, tha ai.
Sipas tij, historia e makinës “e bën atë vërtet të veçantë”.
“Sa herë që takon ose i afrohesh një personi vërtet të famshëm, ndjen diçka të veçantë. Të kesh ose edhe të zotërosh diçka që i përkiste atij/asaj i shton një sasi të madhe vlere”, shtoi ai.
Jaguar nuk është automjeti i parë i personazheve të famshëm që shitet nga The Market. Në të kaluarën, shtëpia e ankandeve ka shitur edhe Range Rover-in e George Michael dhe Cadillac-un e Elvis Presley-t. ©LAPSI.al
