Humbja në finale dhemb, dhe do të vazhdojë të dhembë për një kohë të gjatë për Argjentinën, e cila synonte të hynte edhe më thellë në histori duke fituar dy Botërorë radhazi. Megjithatë, Lionel Scaloni nuk e humbi elegancën e tij. Në një bisedë të gjatë me mediat pas kthimit në atdhe, ai hodhi poshtë çdo teori konspirative, pranoi se fitoi skuadra që e meritoi dhe se Argjentina mbërriti në finale me energjitë e shteruara. Gjithsesi, trajneri nuk konfirmoi nëse do të vazhdojë në pankinën e kombëtares.
Pranimi i Scalonit: “Spanja ishte më e mirë se ne”
Scaloni tregoi edhe një herë sportivitet, ndryshe nga disa prej futbollistëve të tij që u bënë protagonistë të skenave të shëmtuara pas finales. Trajneri nuk u ankua për arbitrimin, nuk akuzoi askënd dhe nuk i dha jetë teorive të konspiracionit, të cilat sipas tij nuk kanë asnjë bazë. “Arbitrimi nuk ishte i padrejtë. Humbëm sepse ata ishin skuadra më e mirë. Duhet ta pranojmë se luajtën shumë më mirë se ne”, deklaroi ai.
Më pas foli për gjendjen fizike të ekipit të tij: “Ndoshta mbërritëm në finale të rraskapitur, rezervuari ynë ishte bosh. Duhet të pranojmë se ata ishin më të fortë dhe kjo do të na bëjë më të mirë në të ardhmen.”
E ardhmja e Scalonit mbetet ende e paqartë
Megjithëse në Argjentinë konsiderohet thuajse i sigurt rinovimi i kontratës, Scaloni nuk pranoi të fliste për të ardhmen. Federata argjentinase dëshiron ta mbajë në krye të skuadrës, si për rezultatet e arritura – dy finale radhazi në Botëror dhe dy triumfe në Kupën e Amerikës – ashtu edhe sepse pas largimit të Messi-t kombëtarja do të nisë një cikël të ri dhe konsiderohet se Scaloni është njeriu ideal për ta drejtuar atë.
