Një shtetas spanjoll është arrestuar në Kosovë, pasi dyshohet se ka rrëmbyer një vajzë 6-vjeçare në Majorka dhe më pas është larguar nga Spanja.
Sipas mediave të huaja, 43-vjeçari e mori të miturën nga ishulli i Majorkës dhe iku nga vendi, duke e fshehur fillimisht në bagazhin e makinës së tij për të shmangur zbulimin. Pasi u largua nga Spanja, autoritetet humbën gjurmët e tij. Gjatë hetimit, u zbulua se i dyshuari kishte mbyllur llogaritë bankare, kishte fshirë profilet në mediat sociale dhe kishte ndryshuar pamjen e tij fizike për ta bërë më të vështirë identifikimin. Falë bashkëpunimit midis autoriteteve nga disa vende evropiane dhe Policisë së Kosovës, u konfirmua se babai dhe vajza ishin në Kosovë.
Më 24 qershor, Policia e Kosovës arrestoi të dyshuarin dhe gjeti edhe vajzën 6-vjeçare, e cila ishte në gjendje të mirë shëndetësore. Pas operacionit, fëmija iu besua institucioneve përgjegjëse për mbrojtjen e të miturve, ndërsa shtetasi spanjoll u mor në paraburgim në pritje të procedurave gjyqësore dhe një vendimi për ekstradim të mundshëm.
