Protesta kundër qeverisë hyn sot në ditën e 94-të. Qytetarët pritet të rikthehen sërish në shesh, ndërsa kërkesa kryesore mbetet dorëheqja e kryeministrit Edi Rama. Krahas largimit të tij, protestuesit kërkojnë edhe ndryshimin e klasës politike dhe krijimin e një qeverie tranzitore me mandat 12-mujor. Sipas tyre, kjo qeveri duhet të krijojë kushtet për një proces të ri politik dhe institucional.
Në listën e kërkesave është edhe shfuqizimi i disa ligjeve që, sipas protestuesve, cenojnë interesat e qytetarëve. Ndërkohë, organizatorët paralajmërojnë një fazë të re të mobilizimit. Ata thonë se gjatë shtatorit dhe tetorit protesta do të zgjerohet, ndërsa kanë bërë thirrje për pjesëmarrje më të madhe në shesh. Pas më shumë se tre muajsh tubime të përditshme, mesazhi i tyre mbetet i pandryshuar: protesta do të vijojë deri në largimin e Edi Ramës nga posti i kryeministrit.
