Neymar e kishte lexuar me kujdes intervistën e dhënë para ndeshjes Brazil-Japoni, e vlefshme për 1/16-at e finaleve të Botërorit 2026, nga Joachim Klement, matematicieni gjerman që kishte parashikuar triumfin e Holandës në turne, pasi kishte gjetur saktë – duke përdorur një model parashikues që merrte në konsideratë shumë faktorë, përfshirë edhe ata ekonomikë të vendeve pjesëmarrëse – fituesit e tre Botërorëve të fundit. Klement kishte deklaruar se Japonia do ta eliminonte Brazilin dhe Neymar nuk priti shumë, pas fitores me përmbysje të skuadrës së Ancelottit, për ta ironizuar matematicienin. Më pas, në mes të natës, publikoi edhe një postim tjetër tallës, pasi edhe Holanda u eliminua nga Maroku.
Errou de novo 😂😂😂😂
— Neymar Jr (@neymarjr) June 30, 2026
Matematicieni gjerman: “Parashikoj fitoren e Japonisë ndaj Brazilit”
Pasi në fillim të qershorit kishte parashikuar rrugëtimin e Botërorit nga çerekfinalet deri te triumfi i Holandës, Klement iu përgjigj kështu një pyetjeje në një intervistë për Fortune India, kur u pyet nëse priste ndonjë surprizë: “Parashikoj se mund të shohim një fitore të Japonisë ndaj Brazilit në ndeshjen e 1/16-ave. Në pamje të parë kjo duket absurde, sepse Brazili është kombëtarja më e suksesshme në historinë e futbollit. Megjithatë, brezi aktual i lojtarëve brazilianë nuk është në kulmin e tij, ndërsa Japonia ka një skuadër shumë të fortë në këtë moment.”
“Më pas duhet shtuar se Japonia e ka mposhtur Gjermaninë në Botërorin e katër viteve më parë dhe Brazilin në një miqësore në tetor të vitit 2025. Prandaj, ideja që Japonia mund ta mundë Brazilin nuk duket më aq e pabesueshme”, kishte përfunduar ekonomisti dhe matematicieni gjerman, i cili u bë i famshëm pasi modeli i tij kishte parashikuar saktë fituesit e Botërorëve 2014 (Gjermania), 2018 (Franca) dhe 2022 (Argjentina).
Hakmarrja e Neymar: dy postime për të tallur Klementin
Me sa duket Neymar nuk i kishte harruar ato fjalë. Pak minuta pasi Martinelli shënoi në minutën e 95-të golin që i dha Brazilit kualifikimin në 1/8-at e finaleve ndaj Japonisë, ai shkroi në X: “Zoti Joachim Klement… ju lutem provoje sërish në Botërorin tjetër.” Më pas, pas eliminimit të Holandës me penallti nga Maroku, ai publikoi edhe një tjetër mesazh: “Gabove sërish.”
Neymar nuk luajti kundër Japonisë, pasi Ancelotti po e ruante për kohën shtesë, por 34-vjeçari e di se sa më larg të shkojë Brazili në këtë Botëror, aq më shumë mund të ketë nevojë për vendosmërinë dhe cilësinë e lojtarëve si ai.
